Мугтасимова Гульназ Ринатовна

Исәнмесез?! Бөгелмә һөнәри педагогия көллиятеннән - Фирая Галимулла кызы Каюмова. Сезне хезмәтләрегез буенча беләм. Төгәл, актив эшлисез, заманча. Афәрин! Бүген мин үзем һәм студентларым татар теле һәм әдәбияты буенча контроль эш эшләдек. Афәрин! Матур эш оештырылды! Тик мондый башлангыч ялгышсыз (!) булсын иде.

Менә алар:

1) "авторизация"дә үк - ябырга (ябарга);

2) үзең турында мәгълүматта: атантаңның исеме (атаңның, бәлки, әтиеңнең кирәктер?);

3) 3 нче сорауда - ике дөрес җавап: мари һәм төрек телләре татар теленә бердәй тугандаш, дип беләм;

4) 4 нче сорауда - нечкәлек-калынлык ягыннан карасаң - чия, ә төркем буенча - яшелчә булган кыяр артык;

5) 32нче сорауда - Тукай Казанга, минем белүемчә, 1907 нче елда кайта, ә җавапларда - 1908, шуның белән бәйле Казан чоры иҗаты да : 1907-1913нче еллар булырга тиеш кебек;

6) "пробный тест"ны да "сынаулы" дип түгел, "Сынау тесты" я "Сынау өчен тәкъдим ителгән тест" дип укыйсы килә.

Болары - кычкырып торганнары гына. Мондый зур Эшнең дәрәҗәсен югарыда күрсәтелгән кимчелекләр төшермәсен иде киләчәктә, дигән максат белән яздым; тырнак астыннан кер эзләү, дип кабул итә күрмәгез, зинһар өчен.

!!! Сезнең ялгышлар булганга түгел, бу конкурсны оештыручылар арасында Сезнең дә исем булганга күрә Сезгә юллыйм бу хатны.

Иң изге теләкләр белән - Фирая Каюмова.